Reportagen: Osterlia Muni
DILI- (Lifaupress): Hafoin halo selesaun Administrasaun, Komando Polisia Nasional Timor -leste ( PNTL) admiti kandidatu Ajente Polisia na’in 12.851. Husi admitidu 22.851 nee, mane hamutuk rihun 9.529 no feto hamutuk rihun 3.322.
Portavos Komisaun Rekrutamentu Superintendente Polisia, Antonio da Luz, liuhusi konferensia imprensa iha iha CFP Comoro, Kinta Feira,02/10/2025 informa, total kandidatu Ajente Polisia sira, neebe submete dokumentu sira husi pontu fokal kada munisipiu hamutuk rihun 13.770, kompostu husi mane rihun 10.255 no feto rihun 3.515.
“Husi total kandidatu sira ne’ebe submete dokumentu sira, sekretariu rekrutamentu halo verifikasaunn no ikus mai hetan kandidatu admitidu hamutuk 12.851. No la admitidu na’in 919, kompostu mane 726, feto 193, ” Portavos Komisaun Rekrutamentu Superintendente Polisia, Antonio da Luz informa.
Ba rezultadu ne’e, Komisaun Rekrutamentu husu ba kandidatu ne’ebe la admitidu iha selesaun dokumentu, bele hato’o reklamasaun durante prazu loron lima, nune’e komisaun bele klarifika.
Hafoin anunsiu rezultadu selesaun dokumentu, tuir loos avansa ba ezame prova kultural iha 05 Outobru 2025. Maibe tanba prosesu verifikasaun persiza tempu, nune’e juri konkursu deside ezame sei realiza iha 12 Outobru 2025.
” Husu ba kandidatu sira ne’ebe admitidu, atu prepara aan didiak tuir teste eskrita prova kultural iha loron 12 Outobru 2025,” Portavoz Antonio da luz dehan.
Nune’e husu kandidatu sira atu iha ona fatin ezame tuku 7:00 to’o 8;00 dader.
Iha tuku 8:30, kandidatu hotu sei simu instrusaun kona-ba preparasaun ezame. Tuku 9:45 kandidatu sira tama ona sala de aula ezame, tuir kedas tuku 10.00 distribui materia. No tuku 10:30 ezame hahu.
Kona-ba fatin ezame, Komisaun desidi realiza iha Salaun eskola Sekundaria sira kada munisipiu inklui munisipiu Dili.
iha munisipiu Aileu fatin exame iha ESTV Aileu Villa ho ESGAM Aileu. Ainaro kandidatura sira tuir ezame iha fatin EBC Venancio Fraz,no Atauro sei hala’o iha ESG 99 Atauro, Baucau iha ESG NO.02 Villa Nova Baucau,Bononaro iha ESG Dom Martinho da Costa Lopes Maliana, Covalima nian sei hala’o iha ESGB – Serankotek – Suai.
Enkuantu iha munisipíu Dili uza CFP, no EBC 30 de Agusto Comoro , ESTV Bekora ho ESTV 28 Novembru Bekora,
Iha munisipíu Ermera sei uza ESG Nino Koni Santa no Eskola Sekundaria 10 de Abril Ermera, Munisipiu Lautem iha ESG Nino Koni Santana Lautem,.
Entretantu iha munisipíu Liquisa sei halao iha Ensino Baziku No.01 Liquisa. Manatuto iha ESG Kay Rala ho Eskola Publica Beadi,
Manufahi iha ESG 1912 Manufahi, Oe-Cusse realiza ih EBC +EBF 1 de Maiu Palaban. No iha Munisipíu Viqueque sei realiza iha Eskola Sekundariu Jeral 4 setempru no Ensinu Baziku 01 Beloi.
Husu kandidatu sira atu prepara Kartun eleitoral original, BI original, lapis no lapizeira kor azul allpagador, regua sirkulus no aviador.
” Husu atu kandidatu sira ba munisipiu idaidak tuir fatin rejistu hodi haree naran. Kandidatu sira ne’ebe rejistu iha CFP mai iha CFP, no sira ne’ebe rezisto iha komando jeral PNTL bele ba haree iha ne’eba,” nia iInforma. (*)
