OE-CUSSE (lifaupress) : Dra Ana Gomes, diplomata senior husi nasaun Portugal, Kinta-feira (2/10/2025) ne’e vizita fatin istoriku Lifau, Panta-Makasar, Rejiaun Administrativa Oe- Cusse Ambeno (RAEOA).
Kuaze tuku 09.23 to’o iha resintu area protejidu turizmu relizioza Lifau, simu ho grupu tebe tradisional Tabso ne’ebe kompostu husi labarik de’it.
Dra Ana Gomes ho delegasaun hetan akompanhamentu husi Prezidenti Autoridade RAEOA, Regio da Cruz Salu no mos Diretor Rejonais sira, inklui Diretor Rejional ba asuntu Kultura no Turizmu, Anastasia Eni.
Marka mos prezensa iha fatin ne’e, Xefe Suku sira, Lia-na’in, komunidade iha area Lifau no hetan siguransa husi membru Polisia Komando Polisia RAEOA.
Vizita ne’e nudar parte husi Roteiu ida ba Illa Crocodilo no Terra de Santa Cruz. Antes ba Oe-cusse, Ana Gomes mos vizita ona Aileu, Bobonaro no seluk tan.
Ojetivu vizita ne’e, atu vizita direta fatin istoriku ne’ebe Portugal la’o tuir ka rai hela iha Timor-leste durante okupasaun kuaze tinan 500.
Iha nia diskursu, Dra. Ana Gomes apresia povu Oe-cusse ne’ebe hatudu nia fraternidade simu nia prezensa. Fatin sira ne’ebe nia vizita durante iha Oe-cusse, hahu husi Kapela Santo Antonio, Igreja tuan, Madre Dominicana, Madre Franciscana no Oe-poto iha Oesilo, fronteira ho Indonesia.
“ Oe-cusse sempre sai ida-ne’ebe besik ho Portugal nia pensamentu. Tanba, hahu husi ne’e mak Portugal sama ain iha illa Crocodilo no introduz relijiaun Katolika. Ami senti, ita ih amizade ne’ebe metin,” Ana Gomes dehan,
Anna Gomes mos pronto atu sai ambassador ba Oe-cusse espesial atu halo esforsu hamutuk ho Oe-cusse harii projetu miniatur ida ho naran Sentru Interpretativa Lifau ne’ebe planeia husi autoridade Oe-cusse no Timor-leste.
Entretantu Preazidenti Autoridade RAEOA, Regio da Cruz Salu hateten, Oe-cusse nudar Eno Na’ek no Nesu Na’ek (Odomatan boot – Tetun) ba Portugal bainhira to’o iha Terra Santa Cruz ne’e.
Tanba ne’e, presiza prezerva duni istroia ne’e atu konsagra husi jerasaun ba jerasaun. “ Ba Oe-cusse, Portugal nuudar rai ida ne’ebe kulturamente la haluha malu. Aqui Tambem Portugal!,” Regio da Cruz Salu reafirma.
Iha okaziaun ne’e, Prezidenti Autroridade ne’e lori Autoridade RAEOA no povu Oe-Cusse nia naran, deklara sai projetu Sentru Interpretativa Lifau no hili Dra. Ana Gomes nudar Amsabadora ba projetu ne’e. Tuir planu projetu ne’e sei termina iha tinan 2030. (*)
