Reportajen: Odelia de J. Santos/Jonio Goncalves
LIKISA (lifaupress) : Formadu na’in 83 simu sertifikadu husi UCFJ Maumeta, Likisa, Kuarta – feira (23/10), tanba remata kursu durante fulan ne’e. Husi formadu na’in 83 ne’e, mane na’in 43 no feto 40.
Atribuisaun sertifikadu ne’e, entrega direta husi Koordenador Sentru UCFJ Liquica, Eduardo Goncalves no parseiru sira, asistu husi autoridade lokal, estudante sira, konvidadus no inan-aman balun.
Koordenador Sentru UCFJ Liquica, Eduardo Goncalves esplika, formadu sira ne’e maihusi programa kursu dalan Korea, Inglesh no Komputador. Benefisiariu sira partisipa kursu oras rua kada loron, hahu Segunda-feira to’o Sesta – feira.
“ Foin-sa’e sira barak interese aprende lingua Korea no Inglesh, tanba hakarak ba servisu iha estrajeiru, hanesan ba nasaun Australia no Kore adu Sul. Ba komputador, iha mos partisipante husi funsiunariu sira, ne’ebe hakarak aproveita tempu kalan aprende komputador,” nia esplika ba jornalista sira, hafoin atribuisaun sertifikadu ne’e.
Alende kursu tolu ne’e, Sentru Formasaun ne’e mos loke opurtunidade ba formasaun dalen Portuges, maibe la iha aplikante.
“ Ami hakarak atu joven sira partisipa maximu iha kurusu lingua. Ba futuru presiza tan kondisaun husi Sentru ne’e, inklui programa Formasaun sira, hodi fasilita di’akliu tan juventude sira,” nia dehan.
Nunee ba futuru, Sentru ne’e sei prepara mos formasaun ba karakter no lideransa no mos prepara fatin ba joven sira husi area rurais ne’ebe mai sidade Likisa atu kontinua estudu iha Ensinu Sekundaria.
“ Ne’e presiza seguransa ka apoiu husi parte hotu, husi parte edukasaun, SEFOPE no parseiru sira servisu hotu, nune’e bele fasilita joven sira nudar benefisiuariu ba programa sira nee,” Eduarto esplika.
Formadu sira, ne’ebe simu sertifikadu agradese ba Sentru Formasaun ne’e, tanba fasilita ona opurtunidade atu hakbit sira nia kunhesimentu no abilidade iha area Komputador, dalen inglesh no Korea.
Formadu Domingos Correia Quintão hateten, durante fulan 6 partisipa formasaun lian Korea, senti kontentino mos sei hasoru dezafiu.
“ Ami – nia dezafou mak senti klima manas, maibe ami agradese tebes, tamba aprendé ona buat balun nuudar bukae hodi prepara ami aan sai ema Ida ne’ebe iha konesimentu no partisipa dezenvolve nasaun ne’e la’o di’ak bao in,” Domingos dehan.
Sorin seluk, estudante kursus programa Komputador, Saunjina Antonio da Cruz mos senti kontenti tebes, bele finaliza kursu no simu ona sertifikadu. “Hau kontente tebtebes, tamba durante fulan 6 Ami aprendé iha fatin ida – ne’e kapas tebes no lori benefisiu pozitivu baa mi ne’e otas sei ki’ik,” Saunjina dehan tan.
Ba joven sira, Saunjina husu atu aproveita tempu didi’ak hodi aprende buat barak, hodi investe aan ba futuru. “ Aproveita didi’ak, tamba joven mak futuru lider Nasaun Timor-Leste ” Saunjina reafirma.
Alende atribui sertifikadu, atividade ne’e mos hala’o hamutuk ho selebrasaun aniversariu ba dahaat (2020 – 2024) , ezistensia Sentru Formasaun ne’e . (*)
SERIMONIA ATRIBUISAUN: Formado sira partisipa ho serif Serimonia Atribuisaun sertifikadu iha Sentru Formasaun Maumetya, Likisa, Kuarta-feira (23/10/2024). Foto LP/Jon/Delya
